Qəçrəş bələdiyyəsinin sədri vəzifəsini icra edən Vüqar Kərimovun ailə üzvlərini öldürmək istəyən 17 il azadlıqdan məhrum edilib. Bu haqda ShimalNews 25 noyabr tarixində məlumat verir.
Hadisənin 2022-ci il avqustun 26-da baş verməsi haqqında xəbər dərc etmişdik. Qımılqazma kənd sakini Aydın Şahverdiyev ona məxsus torpaq sahəsini sənədləşdirmək istəyib. Sədrin bu məsələdə ona kömək etməyəcəyini yəqinləşdirdikdən sonra acığını məmurun 4 ailə üzvünün üzərinə avtomobil sürməklə çıxmağa qərar verib. Kənd sakinlərinin müdaxiləsi nəticəsində cinayətkar öz əməllərini başa çatdıra bilməyib. Nəticədə Könül Hüseynova, Səlimə Kərimova, Kərim Kərimov və İlhamə Kərimova müxtəlif dərəcəli bədən xəsarətləri alıblar.
Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə təqsirləndirilən şəxsə həbs hökmü oxunub.
