Quba rayonunun Qamqam kənd sakini olan falçı həbs edilib. Bu haqda ShimalNews 18 may tarixində “Qafqazinfo”ya istinadən məlumat verir.
Özünü falçı kimi təqdim edərək vətəndaşın xeyli pulunu dələduzluq yolu ilə ələ keçirməkdə ittiham olunan Mətləb Nemətullayevə hökm oxunub. Bakı Ağır Cinayətlər Məhkəməsinin hökmü ilə ona 5 il 6 ay həbs cəzası verilib.
Nemətullayevin cinayətinin üstü xanım müştərisinə hədə-qorxu gəldikdən sonra açılıb.
Sosial şəbəkədə “Baxıcı Ekstrasens Hikmət” adı ilə fəaliyyət göstərmiş şəxs falçı xidməti üçün müraciət edən Mədinə Məmmədovanı (şərti) aldadıb. Mədinə ailəsində yaranmış problemin həll olunması, evindəki caduların təmizlənməsi, qardaşının ondan ayrılmaq üzrə olan həyat yoldaşının evə qayıtmasını və övladını abort etdirməməsi və digər işlər üçün Mətləbə ümumilikdə 7 min 790 manat pul verib.
Bir müddət sonra müttəhim Mədinədən daha 2400 manat miqdarında pul tələb edib. Zərərçəkmiş pulu verməkdən imtina etdikdə isə Mətləb onu özü və yaxın qohumları haqda rüsvayedici məlumatlar yayacağı ilə hədələyib. Bundan əlavə, qisas almaq niyyəti ilə zərərçəkmişin qardaşının və onun qayınanasının şəkillərini sosial şəbəkəyə yerləşdirib.
