Qubada “İntellektual klubların IV gənclər liqası”nın turniri start alıb. Bu haqda ShimalNews 9 dekabr tarixində Rayon İcra Hakimiyyətinə istinadən məlumat verir.
“Heydər Əliyev İli” çərçivəsində təşkil edilən tədbir “Quba Palace” Hotelinin akt zalında keçirilib. Açılış mərasimində RİH başçısının müavini Səidə Abasova, Azərbaycan Respublikası Gənclər Fondunun icraçı direktoru vəzifəsini yerinə yetirən Qədir Xəlilov, təşkilatçı və tərəfdaş qurumların məsul şəxsləri, həmçinin gənclər iştirak ediblər.
2 gün davam edəcək bilik mübarizəsinə 32 komanda qatılıb. Turnirin əsas məqsədi intellektual oyunların gənclər arasında təbliği, onların asudə vaxtlarının faydalı təşkili, region gənclərinin şəbəkələşməsi, intellektual potensialı olan gənclərin aşkara çıxarılması və Heydər Əliyev irsi barədə gənclərin maarifləndirilməsidir.
