Qubada gəlin və qayınana arasında baş verən münaqişənin təfərrüatları bəlli olub. Bu haqda ShimalNews 5 may tarixində Demokrat.az-a istinadən məlumat verir.
37 yaşlı Aynurə yanvarın 25-də saat 21 radələrində yaşadığı evin həyətində qayınanası Lətifə (adlar şərti verilib - red.) ilə mübahisə edib. Gəlin bildirib ki, buna səbəb doğranılmış odunun yığılması məsələsi olub. Qayınanası onun ünvanına söyüş istifadə edib. Aynurə isə onu yumruqla və ağac parçası ilə vurub.
Məhkəmədə gəlin özünü təqsirli bilib. Hökmə əsasən, o, aylıq qazancının 10 faizi dövlət nəfinə tutulmaqla 6 ay müddətinə islah işləri cəzasına məhkum edilib.
