Qax rayonunda yerləşən Ramramay (İlisu) şəlaləsinin ətrafında antisanitar vəziyyət müşahidə olunur.
Shimal.News-a daxil olan məlumatlara görə, əraziyə istirahət məqsədilə gələn yerli sakinlər və turistlər tərəfindən tullantılar ətrafa atılıb. Şəlalənin yaxınlığında plastik qablar, siqaret kötükləri və digər məişət tullantıları açıq şəkildə gözə dəyir.
Təbiətin qorunması üçün xüsusi əhəmiyyətə malik olan bu məkanda belə mənzərənin yaranması narahatlıq doğurur.
Sakinlər qeyd edirlər ki, ərazidə nə zibil qutuları var, nə də mütəmadi təmizlik işləri aparılır.
Bu cür məsuliyyətsiz yanaşma həm ətraf mühitə zərər vurur, həm də turizm potensialına mənfi təsir göstərir.
Aidiyyəti qurumlar ərazidə nəzarəti gücləndirməli, tullantılar yığılmalı və ekoloji maarifləndirmə işləri aparılmalıdır. Eyni zamanda vətəndaşlar da təbiətə qarşı diqqətli və məsuliyyətli davranmalıdırlar.
