Qax rayonunun Ləkit kəndində təbiət abidəsi kimi qorunan Mamırlı şəlaləsinə gedən yolda uçqun baş verib.
Unikal.az-ın məlumatına görə, kəndin içməli və suvarma su ilə təminatında bir müddət fasilə yaranıb.
Kənd bələdiyyəsinin sədri İlqar Məmmədovun sözlərinə görə uçqun hadisəsi bir neçə mərhələdə baş verib. Əvvəlcə sakinlər çayın qarşısını açsalar da sonrakı gün yenidən uçqun baş verib. Bu zaman böyük çəkidə qum və torpaq kütləsi axaraq su xətlərini zədələyib, çayın hövzəsində kiçik göl əmələ gətirib.
Hadisədən sonra əraziyə texnika cəlb olunub, kənd sakinlərinin də əl köməyi ilə su xətləri bərpa olunub, çayın qarşısı təmizlənərək su axını təmin edilib.
