Qəblədə keçirilən “Qış nağılı” Beynəlxalq Musiqi Festivalının 3-cü günü məşhur akkordeon ifaçısı Aydar Qaynullinin “Eyforiya” ansamblının (Rusiya-Almaniya) konsert proqramı ilə yadda qalıb.
Azərtag.az-ın məlumatına görə, Konsert zamanı “Eyforiya” ansamblının ifa etdiyi Y.Tirsenin “Ameli” kinofilmindən musiqi, A.İvanovun “Fiyesta”, A.Qaynullinin “Avrasiya”, “Eyforiya”, A.Şnitkenin “Ruhi xəstələr evində Tanqo”, A.Piazzollanın “Oblivion”, “Libertanqo”, H.Zimmerin “Mombasa”, E.Makarovun “Santa Mariya”, V.Montinin “Çardaş”, “Miserlou” və digər musiqi kompozisiyaları tamaşaçılara yüksək əhvali-ruhiyyə bəxş edib.
“Eyforiya” ansamblı dünya şöhrətli akkordeon və vokal ifaçı, bəstəkar, Tatarıstan Respublikasının Əməkdar artisti Aydar Qaynullin tərəfindən 2010-cu ildə yaradılıb. Onun tərkibi beynəlxalq müsabiqələr laureatları olan Aleksey Vaqner (gitara), Svetlana Bezotosnaya (violin, vokal), Aleksandr Muravyov (kontrabas), Sergey Şamov (zərb alətləri) kimi virtuoz ifaçılardan ibarətdir. Kollektivin repertuarına flamenko, tanqo, rok, latın, parlaq enerji və müasir səslənmələr ilə zəngin olan kinofilmlərdən musiqi fraqmentləri daxildir.
Festival çərçivəsində fevralın 10-da saat 16:00-da tamaşaçılara Polşanın “Glassduo” ansamblının konserti təqdim ediləcək.
