Azərbaycanda turizm deyəndə Qəbələ yada düşür. Təbiəti, mətbəxi, naz-nemətləri ilə insanları valeh edən bölgədə lap bənzədiyi Monakonun knyazlarını heyrətə salacaq qədər pul qazanmaq olar. Amma hər şey Qəbələnin "üçqulaq" paxlavası kimi asan deyil. Buranın elə kəndləri var ki, oraya gedib çatınca nəinki bütün pulun, az qala canın çıxır.
Apa TV-nin məlumatına görə, Bayramkoxa kəndi rayon mərkəzindən 25 km aralıda yerləşir.
Oraya getmək üçün hava limanı istiqamətinə bir neçə km asfalt yolu avtomobillə qət edib Hacallı kəndinin yanında dayanmaq lazımdır. Möhtəşəm təbiətə malik olan bu kəndi Dəmiraparan çayı 2 hissəyə bölür. Kəndə aid olan əkin sahələrinin 70 %-dən çoxu da çayın digər tayındadır. Əhali sayı 1300-dən artıq olan kənddə 270-dən çox təsərrüfat mövcuddur. Bir neçə kəndin 1 qəbiristanlığı var. Hamı da eyni körpüdən istifadə edir. Təsəvvür edin ki, bir az güclü yağış yağdı, sel gəldisə - körpü yoxdur. Taxtadan hazırlanan körpü 15 ildən çoxdur ki, qəzalı vəziyyətdədir.
