Quba Rayon Polis Şöbəsinin əməkdaşları müxtəlif rayonlarda vətəndaşların pullarını mənimsəyən şəxsi həbs ediblər. Bu haqda ShimalNews 4 noyabr tarixində DİN Mətbuat Xidmətinə istinadən məlumat verir.
Əməliyyat-axtarış tədbirləri zamanı Bakı şəhər sakini Romal Bəyəlizadə Qubada saxlanılıb. O, talama məqsədilə insanların etibarından sui-istifadə edib, sosial müavinət düzəldəcəyi adı ilə zərərçəkənləri aldadaraq onların külli miqdarda pullarını mənimsəyib.
Həmin şəxs ifadəsində etdiyi dələduzluq əməllərini səmimi etiraf edib.
R.Bəyəlizadənin əməllərindən zərər çəkən şəxslərdən DİN-in “102 Xidməti Zəng Mərkəzi”nə və Quba RPŞ-nin (+994 23 335 35 11) şəhər nömrəsinə zəng edərək məlumat vermələri xahiş olunur.
Faktla bağlı araşdırma aparılır.
