BMT-nin Baş Assambleyasının 2017-ci ildə verdiyi qərara əsasən, hər il mayın 20-si Dünya Arı Günü kimi qeyd edilir. Dünya Arı Gününün qeyd edilməsində məqsəd arıların planetin və insanların sağlamlığı üçün daşıdığı böyük əhəmiyyətə, eyni zamanda, arıçılıq təsərrüfatlarının qarşılaşdıqları çoxsaylı problemlərə diqqət çəkməklə, bu barədə məlumatlılığı artırmaqdır.
AZƏRTAC-ın məlumatına görə, son illər ölkəmizdə də arıçılıq inkişaf edir, bu sahədə müsbət nəticələr əldə olunur. Bu, ilk növbədə, peşəsini sevən, daim yeniliklərə can atan insanların sayəsində baş verir. Qəbələdən olan arıçı Anar Məmmədov kimi. Dünya Arı Günündə təsərrüfatında arıçılıq məhsullarından ibarət sərgi-muzey açan Anar Məmmədov bundan əvvəl də bir sıra layihələri ilə yerli və xarici qonaqların diqqətini özünə cəlb edə bilib.
Məmmədovlar ailəsi Qəbələnin ucqar Məmmədağalı kəndində yaşayır. Ailə təsərrüfatı da elə həyətlərində yerləşir. Lakin bu məkana ilin hansı fəslində daxil olsanız, burada arıçılıqla bağlı diqqətinizi bir deyil, bir neçə yenilik, maraqlı məqam cəlb edəcək.
Beş il əvvəl təsərrüfatın ətrafını arıçılığa dair rəsmlərlə bəzəyərək, yerli və xarici qonaqların diqqətini çəkən arıçı Anar Məmmədov daha sonra ilk apiterapiya (arı zəhəri və onun məhsullarından istifadə etməklə müalicə üsulu – red.) otaqları təşkil edərək, bura gələnlərə xidmət göstərməyə başlayıb. Son illər yüzlərlə insan bu otaqlarda apiterapiya müalicəsi alıb.
İllərini bu çətin və maraqlı peşəyə həsr edən ailə üzvləri arıçılığı nəsildən-nəslə ötürür. Məmmədovlar ailəsi 40 ildən çoxdur ki, arıçılıqla məşğuldur. Babadan başlayan bu ənənəni bu gün nəvələr davam etdirir. Ailə uzun illər bu sahə ilə məşğul olduğundan istehsal etdikləri məhsulların sərgi və muzeyini təşkil etmək qərarına gəlib.
Arıçı Anar Məmmədov yerli həmkarlarının deyil, həm də xarici ölkələrin arıçılığa dair təcrübəsini öyrənir, yenilikləri təsərrüfatında tətbiq edir. “Yerli və xarici ölkələrdə qatıldığım sərgilər mənə biliyimi, təcrübəmi artırmağa imkan verir. Bu sərgilərdə gördüyüm yenilikləri öz təsərrüfatımda tətbiq etməyə çalışıram. Ən böyük arzum isə təsərrüfatımda istehsal etdiyimiz məhsulların muzeyini açmaq idi”, - deyən Anar Məmmədov artıq bu istiqamətdə ilk addımın atıldığını vurğulayır.
“Bəs, sərgi-muzeydə hansı arı məhsulları nümayiş etdirilir?”, - deyə sual etdikdə, arıçı bildirir ki, təsərrüfatında beş növ bal var: “Buraya çiçək və lavanda balları, eyni zamanda, köçəri arıçılıqdan topladığımız cökə, dağ balı və şabalıd balı daxildir. Təsərrüfatımızda 2019-cu ildə əldə etdiyimiz bir neçə növ məhsulumuz bu gün muzeyimizi bəzəyir”. Arıçı onu da əlavə edir ki, burada güləm, çiçək tozu, arı südü kimi məhsullar da var.
Təsərrüfatında daim yenilik və innovasiyalara üstünlük verən arıçı həyətində yetişdirdiyi meyvə və giləmeyvələrin sirkəsini də hazırlayır. Arıçı bu il ballı sirkə hazırlamaqla daha bir ilkə imza atmasından danışıb: “Ailəmizdə hələ keçmişdən sirkə hazırlamaq ənənəsi vardı. Bu işi yenidən bərpa etmişik. Hazırda 15 növ sirkə hazırlayırıq. Bu ildən isə sirkə çeşidlərinin sırasına ballı sirkəmizi də qoşduq. Bu, çiçək balından hazırlanan sirkədir. Gələcəkdə digər ballardan da sirkə hazırlayacağıq”.
Qeyd edək ki, rayonda və ölkəmizdə arıçılığın inkişafına töhfələr verən Anar Məmmədov ötən il dövlət başçısının Sərəncamı ilə “Tərəqqi” medalına layiq görülüb.
