İsmayıllı rayonu və ətraf kəndlərdəki fərdi evlərin əksəriyyətinin sənədi, yəni çıxarışı yoxdur.
Xezerxeber.az-ın məlumatına görə, sakinlər çıxarış əldə etmək üçün aidiyyəti qurumlara dəfələrlə müraciət etsələr də, heç bir faydası olmayıb.
Bəzi ərazilərdə torpağın müvafiq sənədləri olsa da ev üçün çıxarış almaq müşkülə çevrilib.
Əmlak məsələləri üzrə ekspert Elnur Fərzəliyev bildirib ki, bölgələrdə pay torpaqları, həmçinin fərdi mənzillər əsasən yerli icra orqanlarının verdiyi müxtəlif sənədlər əsasında idarə edilib: “Əksər ərazilərdə evlərin çıxarış problemi illərdir ki, həllini tapmır”.
Məsələ ilə bağlı Daşımaz Əmlakın Dövlət Kadastrı və Reyestri Publik Hüquqi Şəxsi idarə heyətinin sədr müavini Elşad Məmmədov isə qeyd edib ki, həyat və sağlamlıq üçün təhlükəli olmayan ərazilərdə inşa edilən əksər evlərin çıxarışla təmin olunması istiqamətində işlər aparılır: “Bundan əlavə sənədsiz evlərlə bağlı qeydiyyat portalı da hazırlanıb. Gələcəkdə hər bir vətəndaş özü portal üzərindən müvafiq sənədləri daxil edərək birbaşa çıxarış əldə edə biləcək”.
