İsmayıllının Diyallı kənd sakinlərinin günü güzaranı odun dərdini çəkməkdir.
“İTV”nin məlumatına görə, kənddə yaşayan 17 ailə 30 ildir həyətlərində olan meyvə ağaclarını kəsirlər, ya da baha qiymətə odun almağa məcbur qalırlar:
“2013-cü ildə kəndimiz qazlaşdırılmağa başlanıldı, sevindik ki, bizə də qaz çəkiləcək. Hansısa səbəbdən qazın çəkilişi dayandırıldı, 17 ailə qaza həsrət qaldı. Səbəbin nə olduğunu bilmədik və o vaxtdan odun, ocaq, kömürlə əlləşirik. Bizim də ailələrimiz əziyyət çəkir”, - deyə kənd sakini Rəsul Əliyev bildirib.
Sakinlər bildirir ki, kənddə 90-cı illərə qədər mavi yanacaq olub, lakin sonradan müəyyən səbəblərə görə qazın verilişi dayandırılıb. Bu illər ərzində dəfələrlə aidiyyatı qurumlara müraciət etsələr də, bir faydası olmayıb.
Evləri kəndin mərkəzinə yaxın yerləşən bu 17 ailənin bəxti yol sarıdan da gətirməyib. Belə ki, kəndin asfaltlanması da yarıda dayandırılıb. Enişli yoxuşlu olan bu nahamar yollar sürücüləri xeyli zərərə salır.
Sakinlərin çətin vəziyyətilə bağlı Ağsu Regional Qaz İstismar İdarəsi şifahi olaraq bildirib ki, artıq sözügedən 17 ailə ilə bağlı layihə işləri yekunlaşdırılıb. Yeni ilin ilk rübündə məhs bu günə qədər qazsız qalan 17 ev qazlaşdırılacaq.
