İsmayıllıda qardaş bacısı ilə sevgili olan şəxsi toyda öldürüb.
Shimal.News-un əldə etdiyi məlumata görə, hadisənin istintaqı Şəki Ağır Cinayətlər Məhkəməsinin hakimi Rafail Əliyevin sədrliyi ilə keçirilib.
Belə ki, Nihat Əliyev iyunun 10-u toy üçün İsmayıllıya gedib. Əmisi oğlu Sənan Abdullayevin “Aytən” şadlıq sarayında keçirilən toy məclisində spirtli içki qəbul edərək yüngül sərxoş olub. Həmin toy məclisində iştirak edən əvvəllər tanıdığı Ceyhun Vəliyevi görüb. Bir neçə müddət əvvəl Ceyhunla bacısı Günel arasında olan münasibətə görə qaynaqlanan mübahisəni xatırlayıb. Buna görə Ceyhunun onun yaxın qohumunun toyunda iştirak etməsini qəbul etməyərək öldürmək qərarına gəlib. Cibində gəzdirdiyi qatlanan bıçaqla toy məclisində iştirak edən qohumlarının gözü qarşısında Ceyhunun ürəyindən dəfələrlə bıçaqlayaraq öldürüb.
Nihat Əliyev Azərbaycan Respublikası CM-nin 120.2.2, 120.2.4 və 221.3-cü (insan həyatı üçün təhlükəli olan qəsdən sağlamlığa ağır zərər vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Nihat Əliyev özünü qismən təqsirli bilib. O ifadəsində göstərib ki, bacısıyla Ceyhun arasında sevgi münasibəti olub:
“Narkotik vasitə qurudulmuş marixuanadan istifadə etmişəm, lakin psixotrop maddə metamfetamindən istifadə etməmişəm. Bacım Günellə Ceyhun arasında sevgi münasibəti olub. Buna görə əvvəllər Ceyhuna xəsarət yetirmişəm. Çünki Ceyhun məni həmişə təhqir edib. Mənimlə ədavəti olan çox şəxs olduğu üçün üzərində daim bıçaq gəzdirəm. Həmin toy məclisinə gedəndə də qeyd olunan səbəbdən üzərimdə bıçaq olub.
Günel əri Azərlə Yevlax şəhərində yaşayırdı. Amma Ceyhunla sevgi münasibəti olub. Buna görə onu qolundan bıçaqlamışdım. Toy günü də Ceyhunun orada əylənməsini qəbul edə bilmədim. Ceyhunu öldürmək fikrim yox idi”.
Məhkəmə baxışı zamanı iş üzrə Ceyhun Vəliyevin hüquqi varisi qismində Toğrul Verdiyev ifadə verib:
“Ceyhun mənim oğlumdur. Eşitdiyimə görə Nihad Ceyhunu bacısı ilə münasibəti olduğu üçün bıçaqlayıb. Toyda da oğlum iştirak etmişdi. Mən getmədim. Nihadın qanunla müəyyən edilmiş qaydada cəzalandırılmasını xahiş edirəm”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Nihad Əliyev 18 il müddətinə azadlıqdan məhrum edilib.
Fidan İlqar
