İsmayıllıda şəhid baş leytenant Famil Əhmədzadəyə həsr olunmuş “Bir hərbçinin manifesti və...” kitabının təqdimat mərasimi keçirilib. Bu haqda ShimalNews 7 oktyabr tarixində Rayon İcra Hakimiyyətinə istinadən məlumat verir.
Tədbir Mədəniyyət Mərkəzində baş tutub. Mərasimdə şəhidin keçdiyi ömür və şərəfli döyüş yolu qonaqlar tərəfindən yada salınıb.
Famil Əhmədzadə İsmayıllı şəhər 3 nömrəli məktəb-liseyin tarix müəllimi idi. Vətən müharibəsi başlanan gün könüllü olaraq cəbhəyə yollanıb. Oktyabrın 13-dən 14-nə keçən gecə Talış və Suqovuşanda gedən döyüşlərdə qəhrəmancasına şəhid olub. Noyabrın 3-də Şəhidlər xiyabanında dəfn edilib.
Baş leytenant ölümündən sonra "Vətən uğrunda", "Döyüşdə fərqlənməyə görə", "Suqovuşanın azad olunmasına görə” medalları və 3-cü dərəcəli "Rəşadət" ordeni ilə təltif edilib.
