İsmayıllı sakini Bakıda təxminən 100 dəfə polis idarəsinə gedərək iş rejimini pozduğuna görə həbs edilib. Bu barədə ShimalNews 1 fevral tarixində “Qafqazinfo”ya istinadən məlumat verir.
42 yaşlı qadın dekabrın 21-dən başlayaraq Metropolitendə Polis İdarəsinə gəlib və işçilərinə qarşı nalayiq ifadələr işlədib. Ondan bu hərəkətlərə son qoyması tələb edilib, o isə polisin tələblərinə tabe olmayıb.
Bu səbəbdən əməli törədən barəsində inzibati tutulma haqqında protokol tərtib olunaraq, baxılması üçün Yasamal Rayon Məhkəməsinə göndərilib.
Məsələ ilə bağlı kamera görüntülərini araşdırılıb və ittiham sübuta yetirilib. Qadın İnzibati Xətalar Məcəlləsinin 510 (xırda xuliqanlıq) və 535.1-ci (polisin qanuni əmrinə tabe olmama) maddələri ilə təqsirli bilinərək 10 gün müddətinə həbs edilib.
Məhkəmədə metropolitendə polis şöbəsinin ictimai təhlükəsizlik bölməsinin rəisi bildirib ki, xırda xuliqanlıq edib:
“Qadın əksər hallarda növbətçi hissədə olan polis əməkdaşları ilə dəhlizdə rastlaşdıqda səbəbsiz yerə polislərə nalayiq sözlər deyib. Üstəlik, mənim şəxsi mobil nömrəmə təhqiramiz mesajlar göndərib”.
Təqsirləndirilən şəxs isə məhkəmədə deyib ki, o, polis idarəsinə şikayət etmək üçün tez-tez gedib:
“Bir müddət əvvəl baş vermiş cinayətlə bağlı idarəyə müraciətim olmuşdu. Lakin məni qəbul etmirdilər, hər dəfə növbəti gün gəlməyimi deyirdilər. Daha sonra polis əməkdaşları tərəfindən şiddət və təhqirə məruz qaldım. Bu barədə Yasamal Rayon Prokurorluğuna müraciət etmişəm. Polis idarəsinə təxminən 60-70 dəfə getmişəm. Məqsədim oradakı rəhbər şəxslərlə görüşüb bəzi şəxslərin “axırına çıxmaq” idi. İş üzrə sənədlər qəsdən mənim əleyhimə tərtib edilib. Özümü təqsirli bilmirəm”.
