Qax Rayon İcra Hakimiyyətinin başçısı Musa Şəkiliyevin Hüquq-mühafizə orqanları tərəfindən keçirilən əməliyyatla saxlanılması barədə məlumat yayılıb.
Manset.az-ın məlumatına görə, məsələni dəqiqləşdirmək üçün Qax Rayon İcra Hakimiyyətinin başçısı Musa Şəkiliyev ilə əlaqə saxlamaq mümkün olmayıb.
Daha sonra Musa Şəkiliyevin xalası oğlu, Zaqatala Rayonu İcra Hakimiyyətinin başçısı Mübariz Əhmədzadə ilə əlaqə saxlanılıb. Ona "Sizin xalanız oğlu, Qax Rayon İcra Hakimiyyətinin başçısı Musa Şəkiliyevin saxlanılması barədə məlumat yayılıb. Bu barədə nə deyə bilərsiniz?" deyə sual ünvanlanıb. Mübariz Əhmədzadə bu barədə məlumatı təkzib etməyib:
"Bu kimdir mənə zəng vuran? Mən bu barədə nə deyim... Mən Zaqataladayam. Siz Qaxa zəng edin".
Məlumata görə, əməliyyat zamanı Qax Rayon İcra Hakimiyyətinin başçısı Musa Şəkiliyevlə bərabər müavinləri və rayonun bir neçə vəzifəli şəxsi saxlanılıb. Onlar Bakıya aparılıb.
