"Son illərdə dövlət başçısının diqqəti nəticəsində Zaqatala və Balakən rayonlarında yol, enerji, təhsil, səhiyyə, kənd təsərrüfatı və turizm üzrə turizm sahələri üzrə yüzlərlə layihə həyata keçirilib. Bu investisiyalar bölgəmizi həm iqtisadi, həm sosial cəhətdən daha da güclü edib. Bu gün bizim qarşımızda duran əsas vəzifəmiz görülən işlərin davamlılığını və regionun strateji potensialının tam reallaşdırılmasıdır. Eyni zamanda bölgənin ən vacib hesab etdiyim problemini bir daha səsləndirmək istərdim".
Bunu deputat Azər Kərimli Milli Məclisdə keçirilən büdcə müzakirələri zamanı bildirib.
"Belə ki, son illərdə Tala, Katex və Muxax çaylarının mənbəyindəki dağ yamaclarında torpaq eroziyası artdığından sel sularının gətirdiyi daş, qum alıqlarının çay yatağını doldurması nəticəsində çay yataqlarının səviyyəsi ətraf ərazilərə nisbətən 2-3 metr yuxarı qalxıb.
Nəticə etibarilə yuxarıda qeyd olunan çaylara hətta az miqdarda sel suları gəldikdə çay məcrasından çıxır, əkin və bağ sahələrinə daxil olaraq torpaq eroziyasına səbəb olur. Bu çayların mənsəbinə yaxın meşəlik ərazilərdə sıx bitki örtüyünün inkişafı isə çayların məcrasının dəyişməsinə səbəb olur.
"Yerin təki haqqında" Azərbaycan Respublikasının qanununa əsasən, çay yataqlarında yerləşən qum-çınqıl qarışıqları yer təkinin faydalı qazıntısı sayılır və onların çıxarılması üçün dövlətin xüsusi icazəsi lazımdır. Və icazəsiz çıxarılması qanunsuz sahibkarlıq və yer təkinin qanunsuz istismarı kimi qiymətləndirilir.
Su Məcəlləsinin 79 və 80-ci maddələrinə əsasən isə su obyektlərində tikinti və material hasilatı yalnız müvafiq icazə ilə mümkündür. Əks halda bu fəaliyyət qadağandır", - deyə o, qeyd edib.
