Qubada restoranlara zəng edən şəxs özünü "kapitan Rəşad" kimi təqdim edərək dələduzluq edib. Bu haqda ShimalNews 2 dekabr tarixində məlumat verir.
Cinayətkar telefon danışığı zamanı bildirib ki, polis əməkdaşıdır və işi olduğu üçün özü gələ bilmir. Sifarişini ona taksi ilə çatdırmağı və ödənişi sürücüyə verəcəyini bildirib. Eləcə də üzərində 200 manatlıq əsginas olduğuna görə qalıq qaytarmaq üçün “xırda pul” göndərilməsini istəyib.
Bir qədər sonra "kapitan Rəşad" kuryerə zəng edərək yoldan siqaret almağı da sifariş edib, qalan pulu "M10" (elektron pulqabı) kartına vurmasını xahiş edib. Yemək Polis Şöbəsinə çatanda məlum olub ki, orada belə adda şəxs yoxdur, nömrəsinə isə zəng çatmır.
Eyni zamanda Polis Şöbəsinə digər bir restoranın kuryeri də yemək gətirib və "kapitan Rəşad"ı soruşub. Hər iki halda insanların aldadıldığı məlum olub.
