Qusar sakini özünü vəzifəli şəxsin qohumu kimi təqdim edərək çoxsaylı vətəndaşlara qarşı dələduzluq edib. Bu barədə ShimalNews 27 aprel tarixində Qafqazinfo-ya istinadən məlumat verir.
Məlumata görə, Qusar Rayon Məhkəməsində 34 yaşlı Həsən Zöhrəbəyov Cinayət Məcəlləsinin 178 və 32.4,312.1-ci (Dələduzluq və rüşvət verməyə təhrik) maddələri ilə təqsirləndirilib.
Həsən Qusardakı bayraq meydanında yerləşən restorana rəhbərlik edib. Ona iş üçün müraciət edən Emil adlı şəxsə FHN-in Qusar bölməsində işə düzəldəcəyini vəd verib və ondan 6500 manata yaxın pulunu alıb. O, Bakı şəhər İcra Hakimiyyətinin başçısı Eldar Əzizovun qardaşı Aydın Əzizovun oğlu kimi özünü tanıtmaqla imkanlarından istifadə edərək bu işi həll edəcəyini deyib.
Məhkəmədə Zöhrəbəyovun Bakıda da bir neçə şəxsi anoloji formada aladadaraq pullarını ələ keçirdiyi məlum olub.
Təqsirləndirilən şəxs əvvəllər Aydın Əzizovun sürücüsü olub. Lakin dələduzluq əməlləri üzə çıxandan sonra Aydın Əzizov onun barəsində hüquq-mühafizə orqanlarına şikayət edib və o həbs edilib.
Məhkəmə H.Zöhrəbəyova ümumilikdə 12 il müddətinə həbs cəzası təyin edib.
