Təhsil naziri Emin Əmrullayev çıxışında qızların 15 yaşına qədər məktəbdə oğlanlardan yaxşı oxuduqlarını bildirib. Lakin daha sonra nəticələri zəiflədiyi qeyd edilib. Bu erkən nikahlar və cəmiyyətdə qızlara olan basqı ilə əlaqələndirilib.
Bizim.Media-nın məlumatında görə Ailə, Qadın və Uşaq Problemləri üzrə Dövlət Komitəsi bölgələrdəki qızları təhsilə cəlb etmək üçün görülən işlərlə bağlı açıqlama verib:
“Ailə, Qadın və Uşaq Problemləri üzrə Dövlət Komitəsi tərəfindən 2021-ci ildən başlayaraq Hacı Zeynalabdin Tağıyev tərəfindən yaradılan “Qızlar Məktəbi”nin 120 illik yubileyi və 11 oktyabr Beynəlxalq Qızlar Günü münasibəti ilə “Gənc Qızların Təhsilinə Dəstək” kampaniyasına start verilib. 2023-cü ildən etibarən kampaniya daha geniş vüsət alaraq “Gənc Qızların Təhsilinə Dəstək” layihəsi kimi davam edir. Layihə çərçivəsində regionlardan və aztəminatlı ailələrdən olan, ali təhsil müəssisələrinə qəbul imtahanlarında yüksək bal toplayan qızlara dəstək göstərilir. 2022-ci ildən etibarən layihə Elm və Təhsil Nazirliyinin tabeliyində Təhsilin İnkişafı Fondunun birgə əməkdaşlığı ilə davam edib. Layihənin davamlılığını təmin etmək məqsədilə AR Elm və Təhsil Nazirliyi və Ailə, Qadın və Uşaq Problemləri üzrə Dövlət Komitəsi arasında “Gənc Qızların Təhsilinə Dəstək Kampaniyası” layihəsinin birgə icrası ilə bağlı niyyət protokolu imzalanıb. Həmçinin 2023-cü ildə “Hənifə Məlikova – Zərdabi adına qızların təhsilinə dəstək” təqaüd proqramı təsis olunub”.
Layihəyə cəlb olunan qızların sayı
Komitədən bildirilib ki, layihənin davam etdiyi 4 il ərzində 2024-cü il də daxil olmaqla, ümumilikdə respublikanın 58 rayonu üzrə 144 nəfər qız layihəyə cəlb olunub.
“Belə ki, 2021-ci ildə 14 nəfər, 2022-ci ildə 25 nəfər, 2023-cü ildə 55 nəfər, 2024-cü ildə 50 nəfər seçilib. Ölkənin müxtəlif regionlarından layihəyə seçilənlər arasında Ağdam, Füzuli, Masallı, Zaqatala və Bərdə rayonlarından qızların təmsilçiliyi daha yüksək olub. Layihədə həmçinin şəhid övladı olan tələbə qızlara da dəstək göstərilib. Ümumilikdə layihə keçirilən müddətdə 37 nəfər tələbə qız 600-dən çox və 1 nəfər 700 bal (2024-cü ildə) toplayıb”.
Yeni tədbirlər görüləcək...
“Gənc qızların təhsilinə dəstək” layihəsi çərçivəsində növbəti anlaşma memorandumu 30 oktyabr 2024-cü il tarixində Ailə, Qadın və Uşaq Problemləri üzrə Dövlət Komitəsi ilə “Kapital Bank” Açıq Səhmdar Cəmiyyəti arasında imzalanıb. Memorandumun imzalanmasının məqsədi qızların təhsil imkanlarını artırmaq və onların gələcək inkişafına dəstək olmaqdır.
Məlumat üçün bildirək ki, bankla əməkdaşlıq çərçivəsində ilk təqaüd proqramı “Arzumuz var” sloqanı ilə həyata keçiriləcək. Təqaüd proqramının ilk mərhələsində Bakı şəhəri və regionlardan (Ağcabədi, Qusar, Göyçay) olan 15 nəfər abituriyent qıza dəstək göstəriləcək”.
