Ağsu rayonunun Qaraqaşlı kəndində baş verən soyğunçuluq hadisəsi ilə bağlı təqsirləndirilən Məhəmməd Umudovun kassasiya şikayətinə Ali Məhkəmədə baxılıb. Hakim İlqar Qılıcovun sədrliyi ilə keçirilən prosesdə qərar elan olunub və şikayət təmin edilməyib.
Pravda.az-ın məlumatına görə, Məhəmməd Umudov Cinayət Məcəlləsinin 180.2.4-cü maddəsi (insan həyat və sağlamlığı üçün təhlükəli olmayan zor tətbiq etməklə soyğunçuluq) ilə ittiham olunub. Istintaq müəyyən edib ki, hadisə zamanı o, içkili olub.
İstintaq materiallarına görə, Məhəmməd əmisi oğlu ilə spirtli içki qəbul etdikdən sonra kənd mərkəzinə gedib. Onlar mağazadan siqaret almaq istəsələr də, pulları olmayıb. Bu zaman marketdən çıxan Hüseyn Qəhrəmanov adlı şəxsdən siqaret istəyiblər. Hüseyn onlara siqaret versə də, Məhəmməd əlavə olaraq ondan bir qutu siqaret almasını tələb edib. Qarşı tərəf bu tələbi rədd etdiyi üçün Məhəmməd onu ara küçəyə apararaq sillə vurub və cibindəki bir qutu siqareti götürərək uzaqlaşıb. Zərərçəkmiş daha sonra polisə müraciət edib.
Məhkəmədə Məhəmməd günahını etiraf edib və yüngül cəza istəyini bildirib. Zərərçəkmiş Hüseyn də onu bağışladığını deyərək cəzasının yüngülləşdirilməsini xahiş edib.
Məhkəmənin hökmü ilə Məhəmməd Umudov 3 il müddətinə azadlıqdan məhrum edilib.
