Baş Dövlət Yol Polisi İdarəsinin həftəsonu gözlənilən əlverişsiz hava ilə bağlı hərəkət iştirakçılarına müraciət edərək onlardan yollarda yarana biləcək təhlükələrə qarşı hazırlıqlı olmağı xahiş edib.
Daxili İşlər Nazirliyinin Mətbuat Xidmətindən Shimal.News-a verilən məlumata görə, sinoptiklər həftəsonu ölkə ərazisində hava şəraitinin güclü külək və yağışla müşahidə olunacağı, dağlıq ərazilərdə qar yağması gözlənildiyini bildiriblər.
Baş Dövlət Yol Polisi İdarəsi sürücülərdən sürət həddini minimuma endirməyi, hərəkət zamanı ara məsafəsini normadan artıq saxlamağı, küləkli günlərdə avtomobillərini aşma, qopma ehtimalı yüksək olan obyektlərdən kənarda saxlamağı, xüsusilə qoşqulu, tentli və uzun ölçülü yük avtomobillərinin iştirakı ilə baş verə biləcək qəzaların qarşısının alınması üçün qabaqlayıcı tədbirlər görməyi, avtomobillərin mövsümə uyğun təchizatına xüsusi diqqət ayırmağı xahiş edir.
Həftəsonuna təsadüf edən qeyri-sabit hava şəraitinin səfərə hazırlaşan sürücülər üçün əlavə çətinliklər yaradacağını vurğulamaqla yanaşı, piyadaları da yollarda diqqətli olmağa çağırıb.
