Belə ki, təqsirləndirilən Cavid Bayramov (ad şərtidir) 2008-ci ildə Balakən rayonunda anadan olub. 2023-cü ilin dekabrın 22-də mətbəxdə onun atası Qəhrəman Bayramovla anası Arzu Bayramova arasında mübahisə yaranıb. Mübahisə zamanı kişinin bıçağı arvadının boğazına dirəməsi, təhqir edərək öldürməklə hədələməsi Cavidin əsəbinə toxunub. Bu səbəbdən o, qonaq otağında saxladığı balta ilə Qəhrəman Bayramovu başının arxasından vurub. Atası yerə yıxıldıqdan sonra balta ilə daha iki dəfə zərbə vuraraq öldürüb.

Cavid Bayramov Azərbaycan Respublikası CM-nin 120.1-ci (amansızlıqla həyatdan məhrum etmə) maddəsi ilə təqsirləndirilib.

Məhkəmədə təqsirləndirilən Cavid Bayramov ona qarşı irəli sürülən ittiham üzrə özünü təqsirli bilib:

“Anam balıq doğramaq üçün qonşudan balta gətirməyimi istədi. Mən də birinci mərtəbədə yaşayan Məryəmgildən baltanı götürüb evə qayıtdım. O, balığı doğradıqdan sonra baltanı eyvana qoymuşdu. Bir müddət sonra mətbəxdə anamla atamın mübahisə etdiyini eşitdim. Baltanı qonşuya qaytarmaq üçün eyvana çıxanda kişinin araq içərək anama qışqırdığını gördüm. Etdikləri mübahisəyə görə baltanı qonaq otağına aparıb, onların davalarına qulaq asdım. Qəhrəmanın bıçağı anamın boğazına dirədiyini gördüm. Öldürəcəyindən qorxaraq qonaq otağına qoyduğum baltanı götürüb anamı xilas etmək üçün onu başından vurdum.

Atamı öldürdüyüm üçün polisə təslim olacağımı dedim. Anam məni getməyə qoymadı. İzi itirmək üçün qardaşımla meyiti sellofana büküb, çaya atdıq. Əmimgilə də atamın evdən çıxıb, geri qayıtmadığını dedik”.

Daha sonra məhkəmədə təqsirləndirilən Cavid Bayramovun anası Arzu Bayramova ifadə verib:

“Balakən rayon məhkəməsinin qərarı ilə həyat yoldaşımın həbs qətimkan tədbiri ev dustaqlığı ilə əvəz olundu. Həmin vaxtdan etibarən hər gün içməyə və mənimlə mübahisə etməyə başladı. Hadisə günü Qəhrəman mətbəxdə araq içərkən mənə qarşı əxlaqsız iddialar irəli sürdü. Guya mən polis Bəxtiyarla cinsi münasibətdə olmuşam. Belə sözlər işlətməməsi üçün irad bildirdim. Bu zaman bıçağı boğazıma dirədi və öldürməklə hədələməyə başladı. Cavid bunları eşidib mətbəxə gəldi, əlindəki balta ilə Qəhrəmanın başından vurararaq öldürdü. Oğlum polisə təslim olmaq istəsə də, mən razılaşmadım. Cavid digər oğlum İlyasla birlikdə mətbəxi təmizlədikdən sonra meyiti aparıb uzaq bir yerə, kanala atmaq qərarına gəldilər”.

Tərəflərin çıxışından sonra məhkəmə müşavirəyə yollanıb. Məhkəmənin qərarı ilə Cavid Bayramov 7 il 6 ay müddətinə azadlıqdan məhrum edilib. Azyaşlı olduğu üçün cəzasını ümumi rejimli tərbiyə müəssisəsində çəkəcək.