Şəki Apellyasiya Məhkəməsində cinayət barəsində xəbər verməmə və ya qabaqcadan vəd etmədən cinayəti gizlətmədə təqsirləndirilən Arzu Bayramova və oğlu İlyas Bayramov barəsindəki hökmdən verilən apellyasiya şikayəti üzrə proses başa çatıb.
Pravda.az-ın məlumatına görə, sonuncu iclasda qərar elan olunub və apellyasiya şikayəti təmin edilməyib.
İttihama əsasən, hadisə 22 dekabr 2023-cü ildə Balakən rayonunda baş verib. C. Bayramov ailə münaqişəsi zəminində atası, 1975-ci il təvəllüdlü Qəhrəman Bayramovu balta ilə vuraraq öldürüb.
O, Cinayət Məcəlləsinin 120.1-ci maddəsi (qəsdən adam öldürmə) ilə təqsirli bilinərək 7 il 6 ay müddətinə azadlıqdan məhrum edilib.
C. Bayramov ifadəsində bildirib ki, atası anasını bıçaqla hədələdiyi üçün onu xilas etmək məqsədilə baltayla vurub.
Sonradan onun anası və qardaşı da cinayəti gizlətməyə görə məsuliyyətə cəlb olunublar.
Məlumata görə, C. Bayramov hadisədən sonra polisə təslim olmaq istəsə də, anası Arzu Bayramova buna icazə verməyib və özünü öldürəcəyini deyib. Daha sonra ana iki oğlu ilə birlikdə meyiti gizlətməyə çalışıb. Ana iki oğlu ilə birlikdə meyiti sellofan torbaya və ədyala büküb Mazımçay çayına atıblar. Sonra isə cinayətin izini itirmək üçün qana bulaşmış yerləri təmizləyiblər, baltanı yuyaraq gizlədiblər.
Balakən Rayon Məhkəməsinin hökmü ilə Arzu Bayramova və İlyas Bayramovun hər biri 2 il müddətinə azadlıqdan məhrum ediliblər və məhkəmə zalında həbs olunublar.
