Avtomobillə ana və oğlunu vurmaqda təqsirləndirilən Xızı Rayon Polis Şöbəsinin Cinayət axtarış bölməsinin sabiq baş əməliyyat müvəkkili, polis kapitanı Telman Kərimovun barəsindəki hökmdən verilən kassasiya şikayəti üzrə Ali Məhkəmədə iclas baş tutub.
Pravda.az-ın məlumatına görə, hakim İlkin Rəcəbovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Məhkəmənin növbəti iclası yanvarın 30-na təyin edilib.
Hadisə 2024-ci ill iyulun 7-də Bakı şəhərində, “Həzi Aslanov” metro stansiyasının yaxınlığında qeydə alınıb.
Telman Kərimov idarə etdiyi “Ford Mustang” markalı idman avtomobil ilə 34 yaşlı Qənirə Əhmədovanı və onun 6 yaşlı övladı Muradı vurub. Nəticədə uşaq ölüb.
Onun barəsində Cinayət Məcəlləsinin 263.2-ci (Yol hərəkəti və ya nəqliyyat vasitələrinin istismarı qaydalarını pozma-ölümlə nəticələndikdə) maddəsi ilə ittiham irəli sürülüb.
Xətai Rayon Məhkəməsinin hökmü ilə polis zabitinə 2 il 6 ay müddətinə sürücülük hüququndan məhrum edilməklə 5 il 2 ay müddətinə həbs cəzası verilib. O, məhkəmə zalındaca həbs edilib.
Telman Kərimov daha əvvəl Beyləqan RPŞ-də müstəntiq vəzifəsində də çalışıb. O, hadisədən sonra polis orqanlarından kənarlaşdırılıb.
