Şəki Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən İqbal Bayramovun (ad, soyadı şərtidir) cinayət işi üzrə məhkəmə istintaqı başa çatıb.
Pravda.az-ın məlumatına görə, hakim Xaliq Məmmədovun sədrliyi ilə keçirilən prosesdə hökm oxunub. Hadisəni törədən şəxsə şərti cəza verilib və o, dərhal həbsdən azad edilib.
İttihama görə, hadisə 29 iyul 2024-cü il tarixdə, Ucar rayonunun Qaradağlı kəndində qeydə alınıb. 1960-cı il təvəllüdlü İqbal Bayramov evin həyətində qardaşı oğlu, zərərçəkmiş Məlik Bayramova (ad, soyadı şərtidir) həmkəndlisini döydüyünə görə irad tutub. Bu zaman tərəflər arasında şəxsi münasibətlər zəminində mübahisə yaranıb. Sonra sərxoş vəziyyətdə olan İqbal stolun üzərindən götürdüyü mətbəx bıçağı ilə qardaşı oğlunun bədəninin müxtəlif nahiyələrinə 4 zərbə endirərək ona xəsarətlər yetirib.
