Onlayn qumar oyunlarının təşkili və bu fəaliyyətlərdən əldə edilən vəsaitlərin leqallaşdırılması ilə bağlı “Qumar kralı” Yusif Baqiyev və digər təqsirləndirilən şəxslər barəsindəki cinayət işi məhkəməyə göndərilib.
Shimal.News xəbər verir ki, bu barədə Baş Prokurorluğun Mətbuat xidməti məlumat verib.
Baş Prokuror yanında Korrupsiyaya qarşı Mübarizə Baş İdarəsində aparılan istintaqla müəyyən edilib ki, Yusif Baqiyev 2022-ci ildən 2025-ci ilin fevralınadək Pərviz Məmmədov, Ramil Saadov və digər şəxslərlə birlikdə onlayn qumar oyunları təşkil edərək xüsusilə külli miqdarda gəlir əldə edib. Dəstə üzvləri çoxsaylı şəxslərin adına bank kartları və hesablar açaraq pul dövriyyəsini təmin ediblər.
Qumar oyunlarından əldə edilən 171 milyon manatdan artıq vəsait “Paysis” MMC-nin rəhbəri Samir Nasibovla razılaşma əsasında müxtəlif şəxslərin adına qanunsuz açılmış elektron pul kisələrinə köçürülüb. Bu pulların 41 milyon manatdan çox hissəsi müxtəlif bank hesabları və əmlak alışı vasitəsilə leqallaşdırılıb.
İstintaq zamanı çoxsaylı elektron daşıyıcılar, bank kartları, nağd pul və digər sübutlar götürülüb. Dəstə üzvlərinin hesablarında 171 milyon manatdan artıq dövriyyə müəyyən edilib.
Toplanmış sübutlara əsasən Yusif Baqiyev, Ramil Saadov və Pərviz Məmmədova Cinayət Məcəlləsinin qanunsuz əmlak leqallaşdırma və qumar oyunlarının təşkili ilə bağlı maddələri üzrə ittiham elan edilib. Samir Nasibov isə həmçinin vəzifə saxtakarlığında təqsirləndirilir.
Yusif Baqiyev həbs edilib, Pərviz Məmmədov ev dustaqlığına buraxılıb, Ramil Saadov və Samir Nasibov barəsində polisin nəzarəti qətimkan tədbiri seçilib. Təqsirləndirilən şəxslərin 10 milyon manatdan artıq dəyərdə əmlakına həbs qoyulub və cinayət işi Bakı Ağır Cinayətlər Məhkəməsinə göndərilib.
Axtarışda olan digər şəxslərlə bağlı istintaq davam edir. Daha əvvəl Yusif Baqiyevin qanunsuz qumar şəbəkəsi yaradaraq 161 milyon manat gəlir əldə etdiyi açıqlanıb.
