Oğuz rayonunun Mollalı kəndindən 3 çay keçir. Bu yaşayış məntəqəsinin sakinləri ildə bir neçə dəfə sel təhlükəsini yaşayır.
Bizim.Media-nın məlumatına görə, Mollalı kəndi su sarıdan elə də çətinliyi yoxdur. Bura nadir kəndlərdəndir ki, solundan Qara çay, ortasından Nazar çayın qolu olan Ağçay, sağından isə Türyançay keçir.
Kənd sakini Səyavuş Bayramovun sözlərinə görə, bu, bir tərəfdən sevindirici olsa da, digər tərəfdən olduqca təhlükəli və qorxuncdur.
Kəndin üç hissəyə bölündüyünü deyən sakin son illər daha çox Türyançayın yaratdığı fəsadlardan əziyyət çəkdiklərini dilə gətirir.
“Ötən il yaz və payız aylarında 2 dəfə kəndin bir hissəsini əsasən də Türyançay istiqamətdə yerləşən evləri, həyət-bacanı sel pis günə qoydu. Çəkdiyimiz əziyyət, bostan-tərəvəz, meyvə ağaclarımız eləcə də toyuq-cücəmiz məhv oldu” deyən Səyavuş Bayramov sel təhlükəsinin aradan qalxmadığını bildirir. Belə ki, çayın sahili boyunca torpaq vallar vurulsa da, güclü sel gələndə hamısını yuyub aparır və kəndə istiqamətlənir.
Kəndin digər bir hissəsində yaşayan sakinlər isə daxildən axan Ağçayla bağlı narahatlıqlarını ifadə edir.
“Ağçay kəndimizin daxilindən keçdiyindən burada da biz sakinlərin bir hissəsi əziyyət çəkirik. Ötən il sel bəndləri yuyub apardı. Az qala nəvəmi də su aparacaqdı”, - deyə fikirlərini bölüşən kənd sakini Azər Bayramov vəziyyətin hər il çətinləşdiyini ifadə edir. Yaxınlıqda dayanan Elçin Məmmədov isə kənd qəbiristanlığını da sel təhlükəsi gözlədiyini, artıq 5-10 metr məsafə qaldığını bildirir.
Sakinlərin sözlərinə görə, ötənilki daşqınlardan sonra rayonun yerli qurumlar çayın üzərində müvəqqəti keçid hazırlayıb. Buradan ancaq piyadalar keçə bilir. Çaya sel gələndə isə maşınlar yollarda qalır ki, bu da onlar üçün xeyli problem yaradır.
Sakinlər sözlərinə onu da əlavə edir ki, əsasən xəstələri olanda Təcili Tibbi Yardım maşınları çayı keçə bilmir, məcburən xəstəni əllərində ya qucaqlarında müvəqqəti keçidlə yolun digər hissəsinə keçirmək məcburiyyətində qalırlar.
Bu isə xəstənin həyatı bahasına başa gəlir.
Rayon su meliorasiya sistemlərinin istismarı idarəsindən sakinlərin narahatlığı ilə bağlı məsələyə münasibət öyrəndik. Bildirildi ki, ötən il kəndin Türyançay hissəsi boyunca əlliyə yaxın ev təsərrüfatını sel basaraq sakinlərə xeyli zərər vurub. Bununla bağlı həmin istiqamətdə iki xətt boyunca torpaq vallar vurulsa da sel güclü olanda qarşısını almaq mümkün olmur. Sakinlərin haqlı narahatlığını nəzərə alan idarə rəhbərliyi sel təhlükəsini aradan qaldırmaq məqsədi ilə layihə hazrlayaraq yuxarı orqanlara təqdim edib. Məsələ hazırda öyrənilir və araşdırma mərhələsindədir.
