Şəkidə 11-ci sinif şagirdi sinif yoldaşını bıçaqlayıb.
Oxu.az-ın məlumatına görə, Şəki şəhər sakini, 16 yaşlı Ömər Salamov “Instagram” sosial şəbəkəsində sinif yoldaşı olan qıza “salam, necəsən?” yazıb. Qız onun mesajına cavab verməyib.
Bu yazışmanı görən digər sinif yoldaşı Kərim məktəbdə onunla söhbət edib və niyə qıza yazdığını soruşub. Ömər isə mesaj yazdığını inkar edib. Kərim həmin qıza mesaj yazanı söyüb və Öməri vurub. Yanlarında olan digər şagirdlər mübahisənin böyüməsinə imkan verməyiblər və tərəflər evlərinə gediblər.
Ertəsi gün Ömər qisas almaq məqsədilə evdən bıçaq götürüb və başqa sinif yoldaşından xahiş edib ki, Kərimə zəng vurub onu görüşə çağırsın. Kərim görüşə gəldikdə, Ömər ondan üzr istəməsini tələb edib. Lakin Kərim üzr istəməyib və aralarında yenidən mübahisə başlayıb.
Söhbət zamanı Ömər üzərində gəzdirdiyi bıçaqla sinif yoldaşının qarın nahiyəsindən zərbə endirib. Sinif yoldaşları dərhal hadisə barədə Kərimin atasına məlumat veriblər. Atası oğlunu xəstəxanaya çatdırıb və yaralı əməliyyat olunub.
Polis əməkdaşlarının keçirdikləri əməliyyat tədbirləri nəticəsində Ömər Salamov saxlanılıb. Faktla bağlı cinayət işi başlanılıb və iş baxılması üçün Şəki Ağır Cinayətlər Məhkəməsinə göndərilib.
Məhkəmənin hökmü ilə ona şərti cəza verilib.
