Qaxda ağacları qanunsuz kəsən Qabil Əsədovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Şəki Apellyasiya Məhkəməsində sonuncu keçirilən prosesdə qərar elan edilib. Qərara əsasən, apellyasiya şikayəti təmin edilməyib.
İttihama görə, Qabil Əsədov 2026-cı ilin yanvar ayında Qazmalar kəndi ərazisində yerləşən torpaq sahəsində qəsdən qanunsuz ağac kəsilməsi həyata keçirilib. Söhbət Qax rayonu, Qıpçaq bələdiyyəsinin mülkiyyətində olan, S.İmamovanın istifadəsində olan 4 hektar kənd təsərrüfatı təyinatlı torpaq sahəsindən gedir.
Həmin ərazidə ümumilikdə 125 ədəd qələmə qovaq cinsinə məxsus ağac köküstə, yaş vəziyyətdə, kök boğazından elektrik mişarı ilə kəsilib. Nəticədə təbiətə 33 860 manat məbləğində maddi ziyan vurulub.
Qax Rayon Məhkəməsinin hökmü ilə Qabil Əsədov təqsirli bilinərək 3 il müddətinə azadlığın məhdudlaşdırılması (elektron qolbaq) cəzasına məhkum edilib. Mənbə: Pravda.az