Dünya Bankının maliyyə dəstəyi ilə Azərbaycanın Qəbələ və Salyan rayonlarının kəndlərində torpaqların konsolidasiyası layihəsinin həyata keçirilməsi nəzərdə tutulur.
Bunu Azərbaycanın kənd təsərrüfatı naziri Məcnun Məmmədov ABŞ-yə səfəri çərçivəsində Dünya Bankının nümayəndələri ilə keçirilən görüşün nəticələrini şərh edərkən bildirib.
Nazirin sözlərinə görə, hazırda Azərbaycan Kənd Təsərrüfatı Nazirliyi ilə Dünya Bankı arasında dayanıqlı və rəqabətqabiliyyətli kənd təsərrüfatının inkişafı və suvarma sistemlərinin təkmilləşdirilməsi layihəsi nəzərdən keçirilir.
"Gözlənilir ki, gələn ilin ikinci yarısında layihənin maliyyələşdirilməsi məsələləri həllini tapacaq və Dünya Bankının dəstəyi ilə Azərbaycanın iki bölgəsində torpaqların konsolidasiyası layihəsinin icrasına başlanılacaq", - deyə Məcnun Məmmədov bildirib.
Nazir qeyd edib ki, layihə Prezident İlham Əliyevin 2026-cı il mayın 25-də təsdiqlədiyi kənd təsərrüfatı, balıqçılıq və akvakultura məhsullarının istehsalı və emalı sahələrinin 2026-2030-cu illərdə inkişafına dair dövlət proqramı çərçivəsində həyata keçiriləcək.
Məcnun Məmmədovun sözlərinə görə, Vaşinqtonda Dünya Bankının rəhbər şəxsləri ilə keçirilən görüşdə sözügedən layihənin maliyyələşdirilməsi və icra perspektivləri ilə yanaşı, kənd təsərrüfatının digər istiqamətləri üzrə əməkdaşlığın genişləndirilməsi imkanları da müzakirə olunub.
Nazir vurğulayıb ki, Dünya Bankı ilə əməkdaşlıq Azərbaycanın kənd təsərrüfatında məhsuldarlığın artırılması, torpaq və su ehtiyatlarından daha səmərəli istifadə, eləcə də fermer təsərrüfatlarının inkişafı baxımından mühüm əhəmiyyət daşıyır.
Mənbə: AZƏRTAC