17 noyabr Azərbaycan xalqının milli azadlıq mübarizəsinin başlanğıcı və müstəqilliyə gedən yolun mühüm mərhələsi kimi tarixə düşüb.
Shimal.News xəbər verir ki, bu gün Azərbaycanda Milli Dirçəliş Günü qeyd olunur.
1988-ci ildə Ermənistanın Azərbaycana qarşı ərazi iddiaları və Dağlıq Qarabağda baş verən hadisələr xalqın etirazlarına səbəb olub. Həmin dövrdə Ermənistan ərazisində yaşayan 200 mindən çox azərbaycanlı öz doğma yurdlarından qovulub.
Baş verənlərə və sovet rəhbərliyinin mövqeyinə etiraz edən Azərbaycan xalqı 1988-ci il noyabrın 17-də Bakının Azadlıq meydanında kütləvi mitinqlərə başlayıb. Aksiyalar milli azadlıq hərəkatının genişlənməsində mühüm rol oynayıb.
Dekabr ayında sovet ordusu ağır texnika ilə meydana daxil olaraq mitinqi dağıdıb, şəhərdə fövqəladə vəziyyət elan edilib. Buna baxmayaraq, xalqın azadlıq və müstəqillik tələbi səngiməyib.
1991-ci il oktyabrın 18-də Azərbaycan dövlət müstəqilliyini bərpa edib. Həmin il dekabrın sonunda isə Sovet İttifaqı süquta uğrayıb.
Qeyd edək ki, 1992-ci il noyabrın 17-də Milli Məclisin qərarı ilə 17 noyabr Milli Dirçəliş Günü elan olunub. Bu tarix Azərbaycan xalqının milli birlik, azadlıq və müstəqillik uğrunda mübarizəsinin rəmzlərindən biri kimi qeyd edilir.