Quba rayonunun Çiçi kəndində elektrik təsərrüfatının vəziyyəti ilə bağlı sakinlər redaksiyamıza müraciət ediblər.
Sakinlər Shimal.News-a danışıblar ki, əyilən dirəklər küləkli havada evin üzərinə aşacağından, açıq və aşağıdan keçən naqillərin isə təhlükə yaratmasından ehtiyat edirlər.
Onların sözlərinə görə, kənddə bir sıra elektrik dirəkləri yararsız vəziyyətdədir, naqillərin bir hissəsi isə açıq və yerə yaxın məsafədən keçir. Baxmayaraq ki, ətraf kəndlərin bir çoxunda elektrik xətləri kabelləşdirilib, Çiçidə bu istiqamətdə iş görülməyib.
Vətəndaşlar iddia edir ki, məsələ ilə bağlı dəfələrlə elektrik idarəsinə müraciət etsələr də, onlara kabelləri özləri alaraq dəyişdirmələri təklif olunub. Bu isə sakinlərin narazılığına səbəb olub. Onlar elektrik təsərrüfatının təhlükəsiz vəziyyətə gətirilməsinin vətəndaşların deyil, aidiyyəti qurumların məsuliyyətində olduğunu bildirirlər.