Zaqatala rayonunun Yuxarı Çardaxlar kəndində son üç gündə iki nəfəri ilan sancıb, onlardan biri ölüb, digərinin isə müalicəsi xəstəxanada davam etdirilir.
Lent.az-ın məlumatına görə, kənd sakini 49 yaşlı Murad Məhəmməd oğlu Qurbanov iyunun 10-da ailəsinə məxsus əkin sahəsində təsərrüfat işləri ilə məşğul olarkən ilan sancmasına məruz qalıb. O, yaxınlarının köməkliyi ilə Zaqatala Rayon Mərkəzi Xəstəxanasına çatdırılıb. Yaralıya ilkin tibbi yardım göstərildikdən sonra vəziyyəti ağır olduğundan Bakıdakı Kliniki Tibbi Mərkəzin Toksikologiya şöbəsinə göndərilib. Həkimlərin səylərinə baxmayaraq, M. Qurbanov müalicə aldığı tibb müəssisəsində ötən gün vəfat edib.
Bundan başqa, bu gün kənd sakini 34 yaşlı İsmayıl Cuma oğlu Lələyevi yaşadığı evin həyətyanı sahəsində ilan sağ ayaq pəncəsindən sancıb. O, Zaqatala Rayon Mərkəzi Xəstəxanasına yerləşdirilib.
Yaralının vəziyyəti nəzərə alınaraq, müalicəsinin davam etdirilməsi üçün onun gün ərzində Bakıdakı Kliniki Tibbi Mərkəzin Toksikologiya şöbəsinə göndərilməsi nəzərdə tutulur.
