Zaqatala-Muğanlı avtomobil yolunda ölümlə nəticələnən qəza ilə bağlı cinayət işi başlanılıb.
Shimal.News xəbər verir ki, hadisə martın 30-da saat 16:00 radələrində Aşağı Tala kəndi ərazisində qeydə alınıb. Zaqatala rayonunun Muğanlı kənd sakini 39 yaşlı Elvin İsmayıl oğlu Qurbanovun idarə etdiyi "VAZ" markalı avtomobil 49 yaşlı Samir Samid oğlu Yusifovun idarə etdiyi "Mercedes" markalı 90-XR-566 dövlət qeydiyyat nişanlı avtomobillə toqquşub.
Qəza zamanı "VAZ" markalı avtomobildə olan sərnişin 54 yaşlı Ülfət İsrafil oğlu Qurbanov aldığı xəsarətlərdən hadisə yerində ölüb. Həmin avtomobilin sürücüsü Elvin İsmayıl oğlu Qurbanov və avtomobildə olan digər sərnişinlər 19 yaşlı Səməndər Mehman oğlu Qurbanov, 15 yaşlı Loğman Natiq oğlu Məmmədov, 41 yaşlı Səməd Yusif oğlu İbrahimov, "Mercedes" markalı avtomobildə olan sərnişin 50 y aşlı Natəvan Rəsul qızı Yusifova müxtəlif dərəcəli bədən xəsarətləri alıblar.
Faktla bağlı cinayət işi başlanaraq istintaq aparılır.
