Zaqatalada su hovuzunda təmir işləri aparan 32 yaşlı kişi ağır yanıq xəsarətləri alıb.
Shimal.News xəbər verir ki, hadisə bu gün səhər saatlarında rayonun Aşağı Tala kəndində baş verib.
İlkin məlumata görə, Dağlı kəndində qeydiyyatda olan, hazırda Aşağı Tala kəndində yaşayan 32 yaşlı Taleh Tahir oğlu İdrisov su hovuzunda təmir işləri apararkən təbii qazdan istifadə edib. Ehtiyatsızlıq nəticəsində baş verən hadisə zamanı o, müxtəlif dərəcəli yanıq xəsarətləri alıb.
Yaralı dərhal Zaqatala Rayon Mərkəzi Xəstəxanasının Təcili Tibbi Yardım şöbəsinə çatdırılıb. Həkimlər ona gövdənin III dərəcəli termiki yanığı diaqnozu qoyublar.
Vəziyyətinin ağır olması nəzərə alınaraq, Taleh İdrisov ixtisaslaşmış tibbi yardımın davam etdirilməsi üçün Bakı şəhərində yerləşən xəstəxanalardan birinə göndərilib.
Faktla bağlı araşdırma aparılır.
