Son günlər yağan güclü yağışlar Xaçmaz rayonu ərazisində ciddi fəsadlara səbəb olub. Xüsusilə Gödəkli kəndi yaxınlığında torpaq sürüşməsi nəticəsində yolun bir hissəsi çöküb.
Hadisə nəticəsində Ağaşirinoba, Qıraqlı və Gödəkli kəndi istiqamətində hərəkət edən nəqliyyat vasitələri üçün ciddi təhlükə yaranıb. Yolun kənarı tamamilə aşınıb, dərin yarğan əmələ gəlib və ərazi yalnız xəbərdarlıq lentləri ilə müvəqqəti olaraq əhatələnib.
Məsələ ilə bağlı Shimal.News-a danışan yerli sakinlər bildirirlər ki, bu yoldan hər gün yüzlərlə minik və yük avtomobili istifadə edir. Onların sözlərinə görə, aidiyyəti qurumlar əraziyə baxış keçirsələr də, yalnız xəbərdarlıq lentlərini yeniləməklə kifayətlənirlər.
Sakinlər vəziyyətin getdikcə daha təhlükəli hal aldığını vurğulayaraq narahatlıqlarını belə ifadə ediblər:
"Qurumlardan gəlib baxıb oradakı lentləri təzələyib gedirlər. Heç kim əsaslı tədbir görmür. Hər hansı yük maşını keçən zaman yol tamamilə çöksə və faciə baş versə, buna kim cavab verəcək?"
