Xaçmaz rayon sakininin iştirakı ilə baş verən təhlükəli yol-nəqliyyat hadisəsi sosial şəbəkələrdə geniş müzakirələrə səbəb olub.
Avtosfer.az-ın məlumatına görə, hadisə Abşeron rayonu ərazisində, Güzdək yolunda qeydə alınıb.
Görüntülərdən məlum olur ki, "Opel" markalı avtomobilin sürücüsü ötmə əməliyyatı etmək üçün əks hərəkət zolağına çıxıb. Bu zaman qarşıdan gələn avtomobillə təhlükəli vəziyyət yaranıb. Nəticədə sürücü idarəetməni itirərək avtomobili yoldan çıxarıb və maşın dərəyə aşıb.
Hadisə zamanı "Mercedes Atego" markalı yük avtomobilinin sürücüsü də son anda manevr edərək qəzadan yayına bilib.
Qəza nəticəsində xəsarət alan olmasa da, nəqliyyat vasitələrinə maddi ziyan dəyib.
Baş Dövlət Yol Polisi İdarəsinin Yol Patrul Xidməti Alayından verilən məlumata görə, hadisəni törədən Pirquluoba kəndi sakini, 1983-cü il təvəllüdlü Ədalət Hacəliyev barəsində İnzibati Xətalar Məcəlləsinin 327.2-ci maddəsi ilə inzibati protokol tərtib olunub.
