Xaçmaz rayonunun Niyazabad kəndi istiqamətində yerləşən zibil poliqonu ətraf kəndlərin sakinlərinin ciddi narazılığına səbəb olub. Söhbət Niyazabad yolu üzərində, Ağçay, İlxıçı və Qarabağlı kəndlərinin yaxınlığında yerləşən ərazidən gedir.
Shimal.News-a danışan sakinlərin sözlərinə görə, təxminən 6-7 il əvvəl Xaçmaz şəhərinin zibil poliqonu İzmayılovka yaşayış məntəqəsinin yaxınlığından sözügedən əraziyə köçürülüb. Həmin vaxtdan etibarən ətraf kəndlərdə yaşayan əhali üçün vəziyyət getdikcə ağırlaşıb.
Onlar bildirirlər ki, poliqondan yayılan kəskin üfunət qoxusu gündəlik yaşamı demək olar ki, mümkünsüz edib. Bundan əlavə, tullantıların vaxtaşırı yandırılması nəticəsində əraziyə zəhərli tüstü yayılır ki, bu da sakinlərin sağlamlığı üçün ciddi təhlükə yaradır.
Problemin digər tərəfi tullantıların düzgün idarə olunmamasıdır. Sakinlərin iddiasına görə, zibil yalnız poliqon ərazisinə daşınmır, eyni zamanda yol boyu da səpələnir. Bu həm ətraf mühitə ziyan vurur, həm də asfalt örtüyünün deformasiyasına, yolun yararsız vəziyyətə düşməsinə səbəb olur.
Sakinlər zibil poliqonunun ləğv edilməsini və ərazinin tam şəkildə təmizlənməsini tələb edirlər.
