Quba rayonunda yağan güclü yağışlar və sel ciddi fəsadlara səbəb olub.
Shimal.News-a danışan sakinlərin sözlərinə görə, rayonun Amsar kəndi ərazisində yerləşən "Türklər məhəlləsi" yaşayış massivinə gedən yolun üzərindəki körpü uçub.
Hadisədən sonra ərazi ilə əlaqənin çətinləşdiyi bildirilir. Sakinlər gündəlik gediş-gəlişdə ciddi problemlərlə üzləşdiklərini deyirlər.
Onlar aidiyyəti qurumlardan körpünün qısa müddətdə bərpasını və ərazidə təhlükəsizlik tədbirlərinin görülməsini istəyirlər.
Qeyd edək ki, "Türklər məhəlləsi" (Çayüzü) Amsar kəndinin tarixi və mənzərəli yaşayış massivlərindən biri hesab olunur. Ağçayın sahilində, dağətəyi ərazidə yerləşən məhəllə həm yerli sakinlərin, həm də bölgəyə gələn turistlərin tez-tez üz tutduğu yerlərdəndir.
