Balakən rayonunda toy karvanında qəza törədərək 2 nəfərin ölümünə səbəb olan sürücüdən xəbər var.
Ali Məhkəmədə ölümlə nəticələnən yol qəzası ilə bağlı təqsirləndirilən İlkin Hetayevin kassasiya şikayətinə baxılıb.
Pravda.az-ın məlumatına görə, hakim İlqar Cəfərovun sədrliyi ilə keçirilən məhkəmə prosesində qərar elan olunub. Kassasiya şikayəti təmin edilməyib.
İttihama görə, hadisə Balakən rayonunun Şambul kəndi ərazisində baş verib. Hafiz İsmayılov və İlkin Hetayevin idarə etdiyi "Mercedes" markalı iki avtomobil toqquşub.
Qəza nəticəsində iki sərnişin - Şaban Elayev və Günay İsmayılova həyatını itirib. Hər iki sürücü və daha üç nəfər isə xəsarət alıb.
İstintaq zamanı qəzanın baş verməsinə səbəb kimi İlkin Hetayevin yol hərəkəti qaydalarını pozduğu müəyyən edilib.
Məhkəmənin hökmü ilə o, 7 il müddətinə azadlıqdan məhrum edilib. Şəki Apellyasiya Məhkəməsi də şikayəti təmin etməyib.
Ali Məhkəmədə keçirilən son prosesdə isə kassasiya şikayətinin geri götürüldüyü açıqlanıb.
