22 aprel 2026-cı il tarixində saat 13:00 radələrində Bakı–Quba yolunun 129-cu kilometrliyində "DAF" markalı, 19 BX 609 dövlət qeydiyyat nişanlı yük avtomobilinin sürücüsü Azad Tahir oğlu Şivəxanov elektron tərəzi qurğusunun yerləşdiyi yol sahəsinə yaxınlaşarkən nəzarətdən yayınmaq məqsədilə nəqliyyat vasitəsini təhlükəli şəkildə geriyə hərəkət etdirib və digər hərəkət iştirakçıları üçün təhlükə yaradıb.
Daha sonra sürücü dövlət qeydiyyat nişanını qəsdən palçıqlayaraq tanınmaz hala salıb və hərəkətini bu vəziyyətdə davam etdirib.
Həmin qanunazidd hərəkətlər kameralar vasitəsilə aşkarlanıb və nəqliyyat vasitəsi dərhal Yol Patrul Xidməti əməkdaşları tərəfindən saxlanılıb.
Yoxlama zamanı yük avtomobilinin çəkisinin normadan artıq olduğu, sürücünün nəqliyyat vasitəsini idarə etmək hüququnun olmadığı, eləcə də onun idarəetmə zamanı narkotik vasitənin təsiri altında olduğu müəyyən edilib.
Fakt üzrə müvafiq sənədləşmə aparılaraq materiallar məhkəməyə göndərilib. Məhkəmənin qərarına əsasən A. Şivəxanov 30 gün müddətinə inzibati qaydada həbs edilib.
