Quba-Xaçmaz avtomobil yolunun Yergüc kəndi ərazisində yerləşən və uzun müddətdir təhlükə yaratdığı bildirilən iri çinar ağacı aşaraq yolu bağlayıb.
Xatırladaq ki, Shimal.News bu gün səhər saatlarında sözügedən ağacla bağlı xəbər yayımlayaraq, onun təxminən 45 dərəcə bucaq altında yol istiqamətinə əyildiyini və hər an aşaraq hərəkət iştirakçıları üçün təhlükə yarada biləcəyini diqqətə çatdırmışdı.
Sakinlərin sözlərinə görə, ağac aylardır təhlükəli vəziyyətdə olsa da, problem aradan qaldırılmamışdı. Son günlər müşahidə olunan küləkli hava şəraiti isə vəziyyəti daha da kritik həddə çatdırmışdı.
Təhlükə ilə bağlı səsləndirilən narahatlıqlar öz təsdiqini tapıb. Ağac yolun hərəkət hissəsinə aşaraq nəqliyyatın hərəkətində ciddi çətinlik yaradıb və yolun müvəqqəti bağlanmasına səbəb olub.
Sevindirici haldır ki, hadisə zamanı yoldan keçən nəqliyyat vasitələrinin üzərinə ağac düşməyib və xəsarət alan olmayıb. Lakin sakinlər bildirirlər ki, hadisənin daha ağır nəticələrə səbəb olmaması sadəcə təsadüf olub.
Hazırda ərazidə ağacın yoldan kənarlaşdırılması və hərəkətin bərpası istiqamətində tədbirlər görülməsi gözlənilir.
