Yağan leysan yağışları Şabranda bir sıra fəsadlara səbəb olub. Şabrançay və Dəvəçi çayına gələn sel suları kənd sakinlərinə ciddi ziyan vurub.
Sakinlərin sözlərinə görə, sel nəticəsində körpülər dağılıb, kənddaxili yollar yararsız vəziyyətə düşüb, geniş ərazilər suyun təsiri ilə yuyulub aparılıb.
"Gələn sellər bizə böyük tələfatlar verdi. Körpülərimizi apardı. Müvəqqəti qurulan yardımçı körpülər də sel sularının təsirindən dağıldı. Kəndin ərazisində sotlarla, hektarlarla torpağı su yuyub aparıb. Kəndimizin gələcəyi təhlükə altındadır. Sel qaz borularını da dağıdıb. Əhalinin böyük əksəriyyəti qazsız qalıb. Körpə uşaqlarımız var, soyuqdan əziyyət çəkirlər", - sakinlərdən biri bildirib.
Digər sakin isə qeyd edib ki, Dəvəçi çayına gələn sel onun həyətinə də ciddi ziyan vurub:
"Sel həyətimdəki ağacların yarısını, demək olar ki, aparıb. Ağaclar hazırda çayın içindədir. 17 uşaq qarşı tərəfdə qalıb, məktəbə gedə bilmirlər. Çıxılmaz vəziyyətdəyik. Mənə dəyən ziyan 12-15 min manat arasındadır".
Video: BakuTV
