Şəki şəhərində taksi fəaliyyəti ilə məşğul olan Vəli həmyerlisi 31 yaşlı Fərid (adlar şərtidir – red.) tərəfindən hücumə məruz qalıb.
İstintaq sənədlərinə görə, hadisə gecə saat 02:30 radələrində Daş Qaya adlanan ərazidə baş verib. Vəli Fəridə onu mənzil başına çatdırmaq üçün gediş haqqı kimi 4 manat alacağını bildirib.
Tərəflər razılaşaraq Gənclər küçəsinə gəliblər. Ünvana çatdıqdan sonra Fərid taksi sürücüsünə üzərində pul olmadığını, yaşadığı evdən pul gətirəcəyini bildirib.
Vəli müştəridən telefonunu, şəxsiyyət vəsiqəsini avtomobildə qoyaraq pul dalınca getməsini istəyib. Tərəflər arasında yaranan mübahisə zamanı Fərid sürücünün baş nahiyəsinə çoxsaylı zərbələr endirərək ona xəsarət yetirib.
Faktla bağlı Fəridin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Fərid həmin vaxt içkili olduğunu bildirib. Eləcə də törətdiyi əməldən peşman olaraq zərərçəkmişlə barışdığını qeyd edib. Zərərçəkmişin ondan hər hansı şikayəti və tələbi olmayıb.
Şəki Rayon Məhkəməsinin hökmü ilə Cinayət Məcəlləsinin 73.2-ci maddəsinə əsasən, təqsirləndirilən şəxs barəsində olan cinayət işinə xitam verilib.
Mənbə: Demokrat.az
