Şəki Apellyasiya Məhkəməsində tibbi xidmətin göstərilməsi qaydalarını pozmaqda təqsirləndirilən Elçin Mahmudovun barəsindəki hökmdən verilən apellyasiya şikayətləri üzrə məhkəmə iclası başa çatıb.
Hakim Anar Əsgərovun sədrliyi ilə keçirilən prosesdə qərar elan olunub.
Qərara əsasən, təqsirləndirilən şəxsin apellyasiya şikayəti təmin edilməyib, zərərçəkmiş şəxsin hüquqi varisinin apellyasiya şikayəti isə qismən təmin olunub. Qəbələ Rayon Məhkəməsinin hökmü əlavə cəza hissəsində dəyişdirilib. Belə ki, Elçin Mahmudova təyin edilmiş 1 il 6 ay müddətinə həkimlik fəaliyyəti ilə məşğul olmaq hüququndan məhrumetmə cəzası 2 il müddətinə artırılıb.
Qeyd edək ki, ötən ilin iyununda 2009-cu il təvəllüdlü Məleykə Məmmədova boğaz əməliyyatı üçün Qəbələ Rayon Mərkəzi Xəstəxanasına müraciət edib. Yeniyetmənin üzərində tonzillektomiya əməliyyatı aparılıb. O, üç gün sonra kəskin qanaxma səbəbindən xəstəxanada dünyasını dəyişib.
Hadisədən sonra Qəbələ Rayon Mərkəzi Xəstəxanasının cərrahiyyə şöbəsində həkim-otorinolarinqoloq vəzifəsində çalışan Elçin Mahmudov saxlanılaraq cinayət məsuliyyətinə cəlb edilib.
Qəbələ Rayon Məhkəməsinin hökmü ilə o, 3 il müddətinə azadlıqdan məhrum edilib. Bundan əlavə, Elçin Mahmudovun 1 il 6 ay müddətinə həkimlik fəaliyyəti ilə məşğul olmaq hüququndan məhrum edilməsi qərara alınıb. Hökmdə onun cəzasını məntəqə tipli cəzaçəkmə müəssisəsində çəkməsi göstərilib.
Mənbə: Pravda.аz
