Tros qırılıb, yoxsa qurğunun diyircəyi relsdən çıxıb? Faciədən dörd gün əvvəl kanatın təmirdə olduğu da bildirilir.
Sentyabrın 8-də Şəkinin Baş Kəldək kəndi ərazisində yerləşən "Şəki Yaylası" istirahət mərkəzində baş verən faciədən sonra hadisənin səbəbləri ilə bağlı yeni məlumatlar ortaya çıxır. İki gəncin ölümü ilə nəticələnən qəzanın dəqiq mexanizmi isə hələ rəsmi şəkildə müəyyən edilməyib.
Shimal.News Azərbaycan mediasında, eləcə də açıq sosial şəbəkələrdə yayılan məlumatları bir araya gətirərək faciə ilə bağlı bu ana qədər məlum olanları təqdim edir.
Hadisə sentyabrın 8-də günorta saatlarında baş verib. TƏBİB-in məlumatına görə, saat 14:50 radələrində "Şəki Yaylası"ndan Respublika Təcili və Təxirəsalınmaz Tibbi Yardım Mərkəzinə çağırış daxil olub. Hadisə yerinə gələn həkimlər iki kişinin artıq həyatını itirdiyini müəyyən ediblər. Faktla bağlı Şəki Rayon Prokurorluğunda araşdırma aparılır.
Faciə nəticəsində Qax rayonunun Zərnə kənd sakini, 1996-cı il təvəllüdlü Coşqun Ceyhun oğlu Məmmədov və 27 yaşlı Ucal Asif oğlu Bayramov həyatlarını itiriblər. Coşqunun Bakıdan Şəkiyə istirahət üçün getdiyi bildirilir. Yaxınlarının mediaya verdiyi məlumata görə, o, "PAŞA Holding" strukturunda mühafizə sahəsində çalışıb və məzuniyyətdə olub.
Ucal Bayramovun isə DOST Agentliyinin əməkdaşı olduğu bildirilir. O, 2025-ci il sentyabrın 7-də ailə qurub və Şəkiyə həyat yoldaşı ilə evliliklərinin birinci ildönümünü qeyd etmək üçün gedibmiş.
Hadisədən dərhal sonra yayılan ilkin versiyaya əsasən, əyləncə qurğusunun trosu qırılıb və iki nəfər yüksəklikdən düşüb. Bu versiya TƏBİB-in ilkin məlumatında və daha sonra bir sıra media orqanlarında yer alıb. Bəzi mənbələr hündürlüyün təxminən 40 metr olduğunu yazsa da, bu rəqəm rəsmi qurum tərəfindən təsdiqlənməyib.
Lakin sonra mediada hadisənin mexanizmi ilə bağlı fərqli məlumat yayılıb — qəza qoşaçarxlı kanat tipli qurğudan istifadə zamanı baş verib və trosun özünün qırılmasından deyil, qurğunun asılqanlı diyircəyinin trosdan çıxmasından söhbət gedə bilər. Mənbə həmçinin qurğudan istifadədən əvvəl trosun və digər hissələrin texniki vəziyyətinin yoxlanılmadığını iddia edir. Bu məlumatın da hələ istintaq tərəfindən təsdiqlənmədiyini xüsusi qeyd etmək lazımdır.
Hadisənin gedişi barədə mediada başqa bir versiya da mövcuddur. Bəzi mənbələr Coşqunun qurğuda olduğunu, Ucalın isə aşağıda dayandığını və qopan hissənin ona dəydiyini yazırlar. Digər mənbələr isə hər iki şəxsin qurğudan istifadə etdiyini bildirir. Bu ziddiyyət də göstərir ki, faciənin dəqiq ssenarisini yalnız istintaq və texniki ekspertizadan sonra müəyyənləşdirmək mümkün olacaq.
Ən diqqətçəkən yeni məlumat isə hadisə şahidlərindən birinin yerli mediaya verdiyi açıqlamadır. Adının açıqlanmasını istəməyən şəxs bildirib ki, sentyabrın 4-də "Şəki Yaylası"nda olarkən ona "Mega" kanatın təmirdə olduğu və işləmədiyi deyilib. Sentyabrın 8-də qurğu artıq istifadəyə açıq olub.
Şahidin sözlərinə görə, o özü həmin gün kanatdan istifadə edib və təxminən beş dəqiqə sonra faciə baş verib. Şahid hadisədən az əvvəl çəkilmiş videonu da mediaya təqdim edib. Bu açıqlama təsdiqini taparsa, istintaq üçün əsas suallardan biri qurğuda hansı təmir işlərinin aparıldığı, onun kim tərəfindən yoxlanıldığı və yenidən istifadəyə kimin icazə verdiyi olacaq.
Hadisədən sonra əyləncə qurğularının təhlükəsizliyinə nəzarət məsələsi də gündəmə gəlib. Təhlükəsizlik üzrə ekspert Samir Nəbiyev bildirib ki, bu tip avadanlığın təhlükəsiz istismarının təşkilinə ilk növbədə onu işlədən müəssisə cavabdehdir. İndi qurğunun sonuncu dəfə nə vaxt və kim tərəfindən texniki baxışdan keçirilməsi əsas suallardan biridir.
Mediada "Şəki Yaylası" istirahət mərkəzinin sahibinin iş adamı Məhərrəm Novruzov olduğu barədə də məlumat yayılıb. Novruzovun Masazırdakı "Qurtuluş-93" yaşayış kompleksi və Novxanıdakı "My Beach" istirahət mərkəzi ilə də əlaqəli olduğu bildirilir. Lakin bu məlumatla bağlı istirahət mərkəzinin özünün və ya dövlət qurumlarının rəsmi açıqlamasına rast gəlinməyib.
Hazırda faciə ilə bağlı Şəki Rayon Prokurorluğunun araşdırması davam edir. Açıq mənbələrdə hələlik cinayət işinin başlanması, kiməsə ittiham verilməsi və ya texniki ekspertizanın yekun nəticəsi barədə rəsmi məlumat yoxdur.
Beləliklə, bu ana qədər cavabı olmayan əsas suallar bunlardır: qəza zamanı həqiqətən tros qırılıb, yoxsa qurğunun hərəkətli hissəsi trosdan çıxıb; kanat hansı nasazlığa görə dörd gün əvvəl təmirə bağlanmışdı; təmiri kim həyata keçirmişdi; qurğu istifadəyə verilməzdən əvvəl texniki yoxlamadan keçmişdimi və faciənin qarşısını almaq mümkün idimi?
Bu suallara artıq sosial şəbəkələrdə yayılan versiyalar deyil, prokurorluğun araşdırması və texniki ekspertiza cavab verməlidir.
