Sentyabrın 8-də Şəkinin Baş Kəldək kəndi ərazisində yerləşən "Şəki Yaylası" istirahət mərkəzində iki nəfərin - 31 yaşlı Coşqun Məmmədov və 27 yaşlı Ucal Bayramovun ölümü ilə nəticələnən hadisədən sonra istirahət mərkəzinin fəaliyyəti və təhlükəsizlik məsələləri də gündəmə gəlib.
Shimal.News olaraq "Şəki Yaylası" ilə bağlı açıq mənbələrdə, o cümlədən sosial şəbəkələrdə və istifadəçi rəylərində yayılan məlumatları nəzərdən keçirdik.
Araşdırma zamanı istirahət mərkəzi ilə bağlı genişmiqyaslı qalmaqal və ya məhkəməyə daşınmış kütləvi insident barədə məlumata rast gəlinməyib. Bununla yanaşı, ayrı-ayrı istifadəçi rəylərində xidmət və infrastrukturla bağlı narazılıqlar ifadə olunub.
Ən çox diqqət çəkən məqamlardan biri xidmətin ləng olmasıdır. Bəzi ziyarətçilər xüsusilə həftəsonları və sıx mövsümdə restoran və kotteclərdə xidmətin gecikməsindən, sifarişlərin vaxtında təqdim edilməməsindən narazılıq ediblər.
Rəylərdə qiymətlərlə bağlı narazılıqlara da rast gəlinir. Bəzi istifadəçilər mövsümi sıxlıq zamanı menyu və əyləncə xidmətlərinin qiymətlərinin gözlənilməz şəkildə dəyişdiyini bildiriblər.
Digər şikayətlər isə kotteclərin və infrastrukturun vəziyyəti ilə bağlıdır. Ayrı-ayrı rəylərdə sanitar qovşaqlar, isti su, təmizlik və ümumi baxımla bağlı problemlərin olduğu qeyd edilib.
Bəzi ziyarətçilər ərazidə təhlükəsizlik və texniki nəzarətlə bağlı da iradlarını bildiriblər. Xüsusilə əyləncə attraksionları və uşaq oyun zonalarında təhlükəsizlik qaydalarına nəzarətin yetərli olmadığını düşünən istifadəçilərin rəyləri mövcuddur.
