Şəkidə iki nəfərin ölümü ilə nəticələnən kanat faciəsindən sonra əyləncə qurğularının texniki təhlükəsizliyinə kimin nəzarət etdiyi məsələsi gündəmə gəlib.
Shimal.News xəbər verir ki, Baş Kəldək kəndində yerləşən Şəki Yaylası istirahət mərkəzində kanatın trosunun qırılması nəticəsində iki nəfər həyatını itirib. Hadisənin səbəbləri ilə bağlı araşdırma aparılır.
Məsələ ilə əlaqədar Fövqəladə Hallar Nazirliyinə müraciət edilərək qurğunun texniki təhlükəsizlik tələblərinə uyğunluğu, qeydiyyatdan keçirilib-keçirilməməsi, texniki baxışdan keçib-keçməməsi və trosun qırılmasının səbəbləri barədə suallar ünvanlanıb.
FHN-dən sorğuya cavab olaraq bildirilib ki, bu kimi əyləncə qurğularına nəzarət Nazirliyin səlahiyyətlərinə daxil deyil.
Bu açıqlama faciədən sonra mühüm sual doğurur: əgər kanat və digər oxşar əyləncə qurğularının texniki təhlükəsizliyinə FHN nəzarət etmirsə, onların istismara yararlılığına və təhlükəsizliyinə hansı qurum cavabdehdir?
Məsələ xüsusilə ona görə diqqət çəkir ki, təhlükəsizlik mütəxəssisləri belə qurğuların mütəmadi texniki yoxlanılmasının vacibliyini vurğulayırlar.
Qeyd edək ki, FHN-in normativ sənədlərində kanatların və müxtəlif kanat sistemlərinin texniki təhlükəsizliyi ilə bağlı konkret tələblər mövcuddur. Həmin qaydalarda kanatların texniki baxışdan keçirilməsi, zədələnmiş və həddindən artıq yeyilmiş kanatlardan istifadəyə yol verilməməsi, eləcə də onların istehsalçı sənədlərinə uyğun istismar olunması kimi tələblər əksini tapıb.
Lakin bu normaların istirahət mərkəzlərində sərnişinlərin istifadə etdiyi kanat qurğularına hansı formada şamil edildiyi və həmin qurğuların konkret olaraq hansı dövlət qurumu tərəfindən yoxlanıldığı məsələsi açıq qalır.
İki gəncin həyatını itirdiyi faciənin araşdırılması fonunda bu suala aydınlıq gətirilməsi həm "Şəki Yaylası", həm də ölkənin digər turizm və istirahət obyektlərində fəaliyyət göstərən əyləncə qurğuları baxımından mühüm əhəmiyyət daşıyır.
