Qusar rayonunun Yergi Kek kəndində vəziyyət getdikcə kritik həddə çatır.
Shimal.News-a müraciət edən vətəndaşlar bildiriblər ki, kənd artıq bir neçə gündür qar səbəbindən tam mühasirədə qalıb. Əraziyə gedən yol tamamilə bağlanıb, qarın hündürlüyü bəzi yerlərdə 3 metrə qədər yüksəlib.
Məlumata görə, kənddə 3 ailə və 1000-dən çox heyvan köməksiz vəziyyətdə qalıb. Yem ehtiyatının cəmi 2-3 günə tükənəcəyi bildirilir. Ən ciddi problemlərdən biri isə tibbi yardımın kəndə çatdırılmasının mümkün olmamasıdır.
Sakinlər iddia edirlər ki, mövcud vəziyyətə baxmayaraq, aidiyyəti qurumlar tərəfindən reallığı əks etdirməyən məlumatlar verilir və bu da problemin operativ həllinə mane olur.
Qeyd olunur ki, vəziyyətin dərhal ictimailəşdirilməsi və təcili tədbirlərin görülməsi zəruridir. Əks halda, həm insan həyatı, həm də təsərrüfat üçün ağır və geridönməz nəticələrin yaranacağı istisna edilmir.
Məsələ ilə bağlı aidiyyəti qurumların operativ müdaxiləsi tələb olunur.
